Friday , 24 November 2017

Home » खबर खास » टी-20 भारत इंग्लैंड – चहल नै चलते करे अंग्रेज

टी-20 भारत इंग्लैंड – चहल नै चलते करे अंग्रेज

February 2, 2017 12:44 am by: Category: खबर खास Leave a comment A+ / A-

ले बै टी-20 के आखिरी मैच तो आपणै आळै छोरै नै तोड़ पाड़ दिया, समझ गे होगे हां हां बात कर रह्या हूं हरियाणा के उस लाल की अर उसके कमाल की जिसनै लागै काल अंग्रेजां गेलै पुराणी दुश्मनी काढ़ी है। जी हां बात हो री है आपणै बाळक यजुवेंद्र चहल की। जिसनै अंग्रेज जिसे आये थे उसे उल्टे भेज दिये यानि चहल नै चलते करे अंग्रेज।

जै थामनै 1 फरवरी नै होया भारत अर इंग्लैंड का ट्वंटी-ट्वंटी क्रिकेट मैच नहीं देख्या हो तो बता द्यूं के काल भारत नै ज्यब पहले खेलदे होये 202 नंबर बणाए तो वैं भी किमे घणे नहीं लागैं थे। फेर ज्यब अंग्रेज मैदान मैं उतरे तो उनका पहलड़ा बल्लेबाज तो तोळा ए आऊट होग्या पर फेर कप्तान मोर्गन मोगरा लेकै बोलरां कै पाच्छै पड़ लिया। सबतै घणा सूड़ ठाया रैना का बिच्यारै कै 6 बोलां पै 22 नंबर मारे। फेर आपणल छोरै नै पाळा थाम्या अर इसा थाम्या के पहले तो मोर्गन अर उसकै गेल्यां उसका दूसरा डब्बी जो कई देर तै खून पी रह्या था रूट वो आऊट कर दिया। अर ये मोर्गन अर रूट इसे आऊट होये फेर तो इंग्लैंड आळे मैदान तै पवैलियन का रूट पकड़गे आंवै अर जांवै आंवै अर जांवै।

खैर बात या सै के 23 जुलाई 1990 मैं पैदा होया जींद का छोरा यजुवेंद्र चहल हरियाणा की ओड़ तै ए रणजी मैं भी खेल्या करै चाळै की बात या है के भारत की ओड़ तै एक मैच मैं 6 विकेट लेणिया चहल एकला ए है अर जै सारे देशां की बात करां तो श्री लंका आळै मैंडिस जिसनै दो बै 6-6 विकेट ली हैं के बाद तीसरा नंबर आपणै यजुवेंद्र चहल का ए है। एक और गुप्ती बात या सै के आपणे चहल साहब सिर्फ क्रिकेट ए नी शतरंज नै भी आच्छी ढ़ाळ खेल ले हैं यो भारत का एकमात्र इसा खिलाड़ी है जो क्रिकेट अर शतरंज दोनूं खेलां मैं भारत का प्रतिनिधित्व करै है जी हां यजुवेंद्र चहल का नाम आपनै वर्ल्ड चैस फैडरेशन की साइट पै भी मिल ज्यागा।

तो हरियाणा की माटी के इस लाल यजुवेंद्र चहल का कमाल खूब होया अर इंग्लैंड के 6 खिलाड़ियां नै एकला ए ले मरया। चहल की देखा देखी बूमरै कै बी बोळ सी उठी अर तीनां नै ओ ले बेठ्या। एक की किली अमित मिश्रा नै पाड़ ए राखी थी। सोचदे होगे विकटां की बात होगी नंबर किसनै कितणे बणाए तो मेरै तो पसंद आये युवराज छक्के, जोर्डन कै जाड्डा युवराज नै ए चढ़ाया बिच्यारा इतणा डर रह्या के तेरै गेलै भी ब्रैड आळी ना बण जे पर न्यू है थोड़ै मैं ए काम चालग्या उसका इसकै युवराज नै मारे एक ओवर मैं तीन छक्के अर एक चौक्का, ओ तो अगलै अवर मैं इंग्लैंड आळा मील ले बेठ्या युवराज नै चलाकी तै नी तो आज यूवी पाजी भी पूरी फोर्म मैं थे, रैना नै धोनी नै भी इंग्लैंड आळे बोलर जमां पेल कै धोये पर आज कप्तान साहब थोड़ी तोळ मैं थे। फेर भी आपणै तो इतणै मैं ए सब्र है के आपणां चहल चोखा चाल रह्या है। पछलै मैच मैं भी इसनै न्यूं ए जमां बखत पै किल्ली पाड़ी थी अर विकेट वैं उखाड़ी थी जो जमा जम री थी। बाकि इसा है हरियाणा आळे कदे तै एंडी रहे हैं कपिल देव नै तो थाम सारे जाणो ए सो।

टी-20 भारत इंग्लैंड – चहल नै चलते करे अंग्रेज Reviewed by on . ले बै टी-20 के आखिरी मैच तो आपणै आळै छोरै नै तोड़ पाड़ दिया, समझ गे होगे हां हां बात कर रह्या हूं हरियाणा के उस लाल की अर उसके कमाल की जिसनै लागै काल अंग्रेजां ले बै टी-20 के आखिरी मैच तो आपणै आळै छोरै नै तोड़ पाड़ दिया, समझ गे होगे हां हां बात कर रह्या हूं हरियाणा के उस लाल की अर उसके कमाल की जिसनै लागै काल अंग्रेजां Rating: 0

Leave a Comment

scroll to top