Saturday , 23 September 2017

Home » इतिहास खास » चौगरदै धूम मचावां मनावां स्वर्ण जयंती

चौगरदै धूम मचावां मनावां स्वर्ण जयंती

November 3, 2016 10:00 am by: Category: इतिहास खास, खबर खास Leave a comment A+ / A-

swarn-jayanti-haryana

स्वर्ण जयंती का साल चौगरदै पूरै हरियाणै मैं छाया रह्या। हरियाणा सरकार नै हरियाणा की जनता का करोड़ों फूंक कै नै गुरुग्राम मैं प्रोग्राम करया तो। हरियाणा की राजधानी कै तलै पंचकूला में कांग्रेस नै भी उत्सव मनाया बल्के कांग्रेस तो कई कांग्रेस हो री हैं ज्यांतै कांग्रैस नै कई जगहां मनाया। पंचकूला मैं रणदीप सूरजेवाला नै जड़ै खिलाड़ियां तै गुरूआं तै अर अन्य क्षेत्रां मैं उल्लेखनीय काम करण आले गिणे चुणे लोगां तै हरियाणा गौरव सम्मान दिया तो रोहतक मैं पूर्व मुख्यमंत्री हुड्डा नै भी अपणै अंदाज मैं प्रोग्राम रच्या। इब हुड्डा नै प्रोग्राम करया तो तंवर नै भी कमर कसी अर अपणे गढ़ सिरसा मैं उहनै भी टैंट ला दिया। इब एक नई-नई कांग्रेस बणी है कुलदीप बिश्नोई तै। कुलदीप नै कोये प्रोग्राम तो नहीं करया पर सरकारी प्रोग्राम पै उनकी नजर जरुर रही अर इसकी कमी गिणाण लाग गे। बिश्नोई नै आरोप लगाया के सरकार जनता के पिसे का दरूपयोग कर रही है जै यो ए पिसा अपणी वाहवाही की जगहां जनता की भलाई मैं लागदा तो ब्होत बढ़िया होता। दूसरा इतणा हंगा लायां पाच्छै भी सरकार का गुरुग्राम मैं प्रोग्राम एक नंबर का फ्लॉप रह्या। इब कुलदीप की इस बात मैं कोये दम सै के नहीं इसका भी बेरा पाड़या तो बात तो साची लिकड़ी। स्वर्ण जयंती प्रोग्राम देखण आळै एकाधै अधिकारी तै बात होई नाम ना लेण की शर्त पै कह्या के किसे नै बताईये ना सरकार का प्रोग्राम साचूंए ब्होत बकवास था। ना तो कोये खास व्यवस्था थी अर ना इतणे लोग आये जितणी सोच राखी थी। बेरा नी सरकार नै इतणा पिसा क्यां पै लाया है। मोदी, खट्टर अर एक मंत्री ओर था उनकी स्टेज इतणी दूर बणा राखी थी के कुछ दिखै ए नी था। मनै सोच्या के बेरा राजकुमार सैनी आळी स्याहीं की याद आगी हो.. आपणै तो कह्या करैं कुत्तै नै मारगी बिजली मिराड़ देख-देख कुकावै इब थाम न्यू ना कह दियो के कुत्तै गेलै तुलना करै है अर जै घणा ए बूरा मानो तो न्यू समझ ल्यो दूध का जळा लास्सी नै भी फूंक मार-मार पीया करै.. पर मनै तो देखो सुवाद मिराड़ आळी मैं ज्यादा आया करै।

चलो जिसा भी था प्रोग्राम सरकार करवा री थी जितणा भी लाग्या पिसा आपणा यानि के आम जनता का ला री थी। प्रधानमंत्री नै भी ब्होत सराहना करी पर सिटणे से भी देगे। मोदी नै कह्या के मनै हरियाणा की माटी मैं काम करण का मौका मिल्या मैं कुछ अपणापण सा भी जताया पर अपणै परायै का असली बेरा तो कह्या करैं कैण-मुहकैण मैं लाग्या करै। जो आदमी पूरै हरियाणा कै जल्यां पाच्छै, तीसियां लाल खपा होयां पिछै गोडा मोड़ण तो दूर सहानुभूति के दो बोल नी बोल सक्या ओ किसा आपणा होगा।

खैर या भी जाण दे चलो रै 121 करोड़ लोगां का नेता सै 2.5 करोड़ कड़ै याद रहैंदे होंगे उसकै, सोची तो न्यू भी थी के बेरा नी प्रदेश की जनता नै के मिलैगा इस स्वर्ण जंयती पै मिलणा तो दूर बेचारी एनएचएम कर्मचारियां की नौकरी पै ओर संकट खड़या हो रह्या है। सरकार जयंती मना रही थी तो न्यून रोहतक मैं पुलिस सर्व कर्मचारी संघ कै दफ्तर कै बाहर छावनी बणा रही थी। कोये कर्मचारी अपणै हक खात चुसक ना जा सारे पुलिस आळे लठां कै तेल प्याएं सुखपुरा चौंक धोरै डेरा लायें बैठे थे।

दूसरी ओड़ किसान भी हाहाकार कर रहे हैं। सोचैं थे स्वर्ण जयंती मना री है सरकार इबकै तो किमे जीरी कै भा मैं तेजी आवैगी. ये चावल तो दिन ब दिन मंहगे हो रे हैं अर या जीरी नीचै ए आण लाग री है। प्राळी भी सरकार नी फूकण देंदी खड़ी मैं जमीन नी बाही जा इसका राह के लिकड़ै। सरकार नै तो फरमान जारी कर दिया पर करणा तो किसानां नै है सरकार इसका कोये विकल्प भी दे। खेत की बुहाई मैं जो अलग तै खर्चा आवैगा उसका किमे भुगतान करो सरकार पर ना जी सरकार तै उम्मीद इब बेकार है जो सरकार कह कै स्वामीनाथन की रिपोर्ट लागू करण तै मुकरज्या उसतै किसान के उम्मीद करैं।

चलो जय किसान भी हो जा ली जवान तो देश की सेना मैं हर दसमां आपणा ए सै पर ये जवान भी खुदखुशी करण लाग रे हैं। भ्याणी के बामळा गाम का रामकिशन ग्रेवाल दिल्ली कै जंतर-मंतर पै जा रह्या था, पर सरकार की ओर तै कोये सुध ना लेण तै खपा ओ सैनिक अपणी जीवन लीला समाप्त करग्या। उरानै हरियाणा स्वर्ण जयंती मना रह्या था अर ओड़ै रामकिशन सलफाश खा रह्या था।

चलो हाम तो फेर भी न्यू ए कह्वां हां चौगरदै धूम मचावां मनावां स्वर्ण जयंती आप देखो कवि  इंद्रजीत का लिख्या अर हरविंद्र मलिक जी द्वारा निर्देशित यो गीत जो चौगरदै धूम मचा रह्या है।

चौगरदै धूम मचावां मनावां स्वर्ण जयंती Reviewed by on . स्वर्ण जयंती का साल चौगरदै पूरै हरियाणै मैं छाया रह्या। हरियाणा सरकार नै हरियाणा की जनता का करोड़ों फूंक कै नै गुरुग्राम मैं प्रोग्राम करया तो। हरियाणा की राजधा स्वर्ण जयंती का साल चौगरदै पूरै हरियाणै मैं छाया रह्या। हरियाणा सरकार नै हरियाणा की जनता का करोड़ों फूंक कै नै गुरुग्राम मैं प्रोग्राम करया तो। हरियाणा की राजधा Rating: 0

Leave a Comment

scroll to top